A marcha nórdica pecha con éxito a Axenda Impacto Saudable organizada polo Concello para fomentar hábitos sans

14/11/2024

Éxito de participación na última actividade organizada polo Concello de Tomiño dentro da Axenda Impacto Saudable: a marcha nórdica. Esta disciplina deportiva incluíuse por primeira vez nas actividades de balde ofertadas polo Concello ao longo do ano, dada a popularidade cada vez maior que está a ter no noso país.

Seis sesións deseñadas para achegar esta modalidade deportiva á veciñanza sen importar a idade ou a forma física, con 20 prazas que se completaron rápidamente con persoas de Tomiño e arredores interesadas. Tanto a primeira como a segunda cita, celebradas nos días 26 e 27 de outubro e 9 e 10 de novembro, rexistraron un cheo total, agardándose o mesmo resultado para a última convocatoria que terá lugar esta fin de semana, dende as pistas do Mosteiro.

Co obxectivo de impulsar á veciñanza a que se achegue a hábitos saudables dun xeito lúdico e inclusivo, a Concellaría de Deportes deseñou para este ano unha axenda ofertando diferentes actividades, entre as que ademais da marcha nórdica, atopáronse as andainas saudables (con saída todos os xoves dende o Centro de Saúde) e o Camiño a Santiago por tramos, sen esquecer os programas Reactívate e Coñecendo as Emocións.

En caso de choiva, a actividade trasladarase ao pavillón de Goián, garantindo así a continuidade da mesma.

The post A marcha nórdica pecha con éxito a Axenda Impacto Saudable organizada polo Concello para fomentar hábitos sans appeared first on Concello de Tomiño.