Música e humor para reflexionar sobre o cambio climático con Culturactiva en Tomiño

22/10/2024

Entradas á venda unha hora antes do espectáculo

O teatro para público adulto volve un sábado máis a Tomiño para facernos rir e reflexionar. Este 26 de outubro Culturactiva subirá ao escenario do auditorio municipal de Goián co seu ‘Cabaré climático’, un espectáculo atrevido e reflexivo que sitúa ao público nun futuro onde o cambio climático non só é unha realidade evidente, senón que afecta a algo tan persoal como as relacións persoais ou mesmo ao carácter.

Coa idea de que o único que freará o cambio climático é un “cambio”, Culturactiva promete con este cabaré música en directo e moitas risas para poñer enriba da mesa preguntas sobre as repercusións que terá nun futuro non tan afastado. Risos e cancións para abordar un tema moi serio dun xeito único e divertido.

A alcaldesa, Sandra González, anima a todas e todos os tomiñeses a acudir ao auditorio municipal nesta nova sesión de teatro para público adulto para desfrutar “dun espectáculo adiantado ao seu tempo, cun ton irreverente que nos fará rir e, á vez, que nos convidará a pensar”.

A cita será ás 21.00 horas e as entradas para acudir ao espectáculo terán un prezo de 5 euros por persoa. As e os interesados poderán mercar as súas entradas de forma presencial no despacho de billetes do propio auditorio municipal de Goián dende unha hora antes do inicio da obra.

The post Música e humor para reflexionar sobre o cambio climático con Culturactiva en Tomiño appeared first on Concello de Tomiño.